هاني سلامة فنان بجد

 فنان محترم بكل ما تحمله كلمة محترم من معاني من اول لحظة قعدنا مع بعض إكتشفت انه راجل عايز يعمل شغل بجد عايز موضوعات جاده بيكلمني عن اد ايه هو عايز يقدم فن هادف محترم يحرك مشاعر الناس و يشغل عقولها ،  له اهتمامات بالبلد و مشاكلها و بالمجتمع و عيوبه .. فرحت اني في اول تجربة تأليف البطل بتاعي راجل شايف الفن غير فنانين كتير مابيفكروش غير في النجمكه و الايرادات و الإعلانات و الفلوس و ملعون ابو المحتوى .

ناس كتير فاكره الراجل ده متكبر و مغرور و شايف نفسه دنجوان و حاجات من دي..لكن الحقيقه ان الراجل ده متواضع بصوره رائعه ..يشهد على كلامي كل شخص اشتغل في مسلسل " نصيبي وقسمتك " أول تجربة تأليف لي .. مفيش واحد في المسلسل شعر في يوم ان معاه نجم بالشكل التقليدي اللي معروف في السوق من تناكه بقى و غرور و احساس اوفر بالنفس .. فاهم معني كلمة نجم صح ..الالتزام في المواعيد التزام بالتحضير للشخصيات ديموقراطي لدرجة مرعبة.

الراجل ده تعب قوي في المسلسل ده و اتحمل احباطات و ظروف صعبه فوق خيال اي حد و مع ذلك كان بيشتغل بال 15 ساعه عادي بشكل يومي و احيانا 24 ساعه و رغم الارهاق و التعب لا تغيب الابتسامه عن وجهه.

و كان يبقى مش شايف قدامه من التعب لكن كان بيبقى هو صاحب الروح الحلوه جوه المكان بيهزر و يرمي ايفيهات مع الجميع من الصغير للكبير ..على فكره الراجل ده دمه شربات خفة دم غير عاديه بيوقعنا من الضحك.

و الاهم من ده كله انه بيعرف ربنا كويس قوي... لو جينا بقى على المستوى الشخصي ..الراجل ده لا تملك ادامه غير انك تحبه من كل قلبك.. مخلص صادق متصالح مع نفسه اخ حقيقي بكل ما في الكلمه من معنى .. آخر يوم تصوير تعانقنا عناق طويل قال فيه كلام مش هنساه.. انا كسبت كتير جدا في العمل ده و من اهم المكاسب هي اني كسبت اخ راجل ..راجل اسمه هاني سلامه.